ปุตฺโต หุตฺวาน นิพฺพตฺติ, มหาถาโม มหาพโล;

มหายโส มหาโภโค, อาสิ พุทฺธาทิมามโกฯ

[10]

กาตพฺพํ กุสลํ ตสฺมา, ภวสมฺปตฺติ มิจฺฉตา;

ปาเลตพฺพ มโถ สีลํ, ภาเวตพฺพญฺจ ภาวนนฺติฯ

ตโต กุมาโร อุปราชฏฺฐานํ ลภิตฺวา สมฺปตฺติํอนุภวมาโน โมคฺคลิปุตฺตติสฺสตฺเถรมาทิํ กตฺวา มหาภิกฺขุสงฺฆสฺส จีวรปิณฺฑปาตเสนาสนคิลานปจฺจยทานา ทิวเสน สกฺการํ กตฺวา สีลํ รกฺขิตฺวา อุโปสถกมฺมํ กตฺวา อายุปริโยสาเน ยถากมฺมํ คโตติฯ

[11]

เอวํวิธํ สุจริตํ สุมโน กริตฺวา,

ภาคิสฺส เนกวิภวสฺส ภวาภเวสุ;

ตุมฺเหปิ โภ สุจริตํ วิภวานุรูปํ,

กตฺวาน นิพฺพุติปทํ กรคํ กโรถาติฯ

วิสมโลมกุมารสฺส วตฺถุํ ตติยํฯ

14. กญฺจนเทวิยา วตฺถุมฺหิ อยมานุปุพฺพีกถา

ชมฺพุทีเป กิร เทวปุตฺตนครํ นาม ทสฺสนียํ เอกํ นครํ อโหสิฯ ตสฺมิํ สมเย มนุสฺสา เยภุยฺเยน ปตฺตมหํ นาม ปูชํ กโรนฺติ, ภควตา ปริภุตฺตปตฺตํ คเหตฺวา กตาเนกปูชาวิธานา อุสฺสวํ กโรนฺติฯ ตํ ปตฺตมหนฺติ วุจฺจติฯ